Azərbaycan Tibb Universitetinin (ATU) I kurs dermatovenerologiya ixtisası üzrə həkim-rezidenti Murad Məmmədov Avstriyanın paytaxtı Vyanada keçirilən Avropa Dermatologiya və Venerologiya Akademiyasının (EADV) 35-ci illik konqresində iştirak edib.
ATU-dan Aztibb.az-a bildirilib ki, dünyanın müxtəlif ölkələrindən 17 mindən çox nümayəndəni bir araya gətirən beynəlxalq tədbir allerqologiya, dermatologiya və cinsi sağlamlıq sahələrində ən son elmi nailiyyətlərin, müasir diaqnostika imkanlarının və innovativ müalicə üsullarının müzakirə edildiyi mühüm elmi platformalardan biridir.
ATU rezidentinin belə nüfuzlu beynəlxalq elmi tədbirdə iştirakı onun peşəkar bilik və təcrübəsinin artırılması, eləcə də müasir dermatologiyanın son nailiyyətləri ilə tanış olması baxımından xüsusi əhəmiyyətə malikdir.
Konqresin elmi proqramında dermatologiyada süni intellektin diaqnostikada tətbiqi, iqlim dəyişikliyinin dəri sağlamlığına təsiri, eləcə də dəri xəstəliklərinin müalicəsində son klinik yeniliklər əsas mövzular sırasında yer alır.
