Oturanda anal nahiyədə yaranan, ayağa qalxdıqda isə azalan ağrı müxtəlif proktoloji problemlərlə əlaqəli ola bilər.

Aztibb.az xəbər verir ki, cərrah-proktoloq, endoskopist Anar Əliyev bildirdiyinə görə, belə ağrını yalnız uzun müddət oturmaqdan yaranan narahatlıq kimi qiymətləndirmək doğru olmaya bilər.

Mütəxəssis qeyd edib ki, anal nahiyədə və ya anus ətrafında yaranan ağrı hemoroid, anal çat, perianal iltihab və ya abses, koksiks nahiyəsində problemlər, eləcə də digər proktoloji səbəblərlə əlaqəli ola bilər.

Anar Əliyev bildirib ki, ağrının nə vaxt başladığı, nə qədər davam etdiyi, defekasiya ilə əlaqəsi, oturmaqla artıb-artmaması, həmçinin qanama, şişlik və ya ifrazatın olub-olmaması diaqnostika baxımından əhəmiyyətlidir.

Xüsusilə ağrı getdikcə artırsa, anal nahiyədə şişlik, qızartı, temperatur və ya irinli ifrazat yaranırsa, müayinənin gecikdirilməməsi tövsiyə olunur.

Mütəxəssis vurğulayır ki, anal nahiyədə təkrarlanan ağrı normal qəbul edilməməli və onun səbəbi müəyyənləşdirilməlidir.