2026-cı il ənənəvi tibb üzrə Ümumdünya Konfransı oktyabrın 17-18-də Pekində keçiriləcək.
Aztibb.az xəbər verir ki, bu barədə cümə axşamı konfransın təşkilat komitəsi məlumat yayıb.
Tədbir Ümumdünya Səhiyyə Təşkilatı ilə əməkdaşlıq çərçivəsində Pekin Şəhər Xalq Hökuməti, Milli Səhiyyə Komissiyası, Ənənəvi Çin Təbabəti üzrə Milli Administrasiya və Tibbi Məhsullar üzrə Milli İdarə tərəfindən təşkil olunacaq.
Bu il konfransın mövzusu “Texnologiyaların imkanlarından istifadə və kompleks inkişaf: ənənəvi tibbin hamı üçün təşviqi” olacaq.
“China Daily” nəşri yazır ki, ənənəvi tibb üzrə ilk Ümumdünya Konfransı 2024-cü ilin dekabrında Pekində keçirilib. 2024-cü ildə keçirilmiş tədbir çərçivəsində 129 çıxış və təqdimat dinlənilib, həmçinin 3 mindən çox siyasətçi, beynəlxalq təşkilatların nümayəndəsi, ekspert və alimin iştirak etdiyi 13 dialoq keçirilib.
