Oktyabrın 9-u saat 12:00-da Azərbaycan Tibb Universitetində (ATU) uzunillik elmi, klinik və pedaqoji fəaliyyəti ilə beynəlxalq radiologiya ictimaiyyətində tanınan radioloq, tibb elmləri doktoru, professor Rainer Reinmüllerin iştirakı ilə elmi-praktiki seminar keçiriləcək. 

ATU-dan Aztibb.az-a verilən məlumata görə, müasir radiologiyanın aktual istiqamətlərinə həsr olunmuş seminarda professor “How to Read Chest X-rays” (Heart & Lung) – döş qəfəsinin rentgenoqrafiyasının oxunması və “How to Read Cardiac CT” – ürək kompüter tomoqrafiyasının oxunması mövzularında tədris təqdimatları ilə çıxış edəcək. 

Seminar radiologiya üzrə müasir görüntüləmə metodları, diaqnostik yanaşmalar və klinik təcrübə ilə bağlı biliklərin paylaşılması baxımından mühüm əhəmiyyət daşıyır. Tədbir xüsusilə tələbələr, rezidentlər və gənc radioloqlar üçün beynəlxalq təcrübədən faydalanmaq, müasir radiologiyanın aktual istiqamətləri ilə yaxından tanış olmaq və peşəkar biliklərini genişləndirmək imkanı yaradacaq. 

Professor Rainer Reinmüllerin ATU-da keçirəcəyi seminar onun Azərbaycan Radioloqlar Cəmiyyətinin təşkilatçılığı ilə 9–11 oktyabr 2026-cı il tarixlərində gerçəkləşdiriləcək beynəlxalq konfransda iştirakı çərçivəsində təşkil olunur. 

Məkan: Azərbaycan Tibb Universitetinin Tədris Cərrahiyyə Klinikası, -1-ci mərtəbə, akt zalı

Qeyd edək ki, professor Reinmüller elmi fəaliyyətlə yanaşı, radioloji təhsilin və beynəlxalq peşəkar əməkdaşlığın inkişafına da mühüm töhfələr verib. O, beynəlxalq elmi jurnallarda 120-dən çox elmi məqalənin və 400-dən artıq elmi tezisin müəllifidir. Professor 16 milli və beynəlxalq elmi-tibbi cəmiyyətin fəal üzvü olub. Elmi-pedaqoji fəaliyyətinə və radiologiya üzrə təhsil proqramlarının inkişafına verdiyi töhfələrə görə 2005-ci ildə Avropa Radiologiya Cəmiyyətinin “Boris Raevski” medalı ilə təltif edilib.