ATU-nun Tədris Cərrahiyyə Klinikasının Laboratoriyasında müasir real-time PCR texnologiyası əsasında bir sıra infeksion xəstəliklərin və virus yükünün molekulyar diaqnostikası həyata keçirilir.

Bu barədə Aztibb.az-a Klinikadan xəbər verilib.

Bildirilib ki, laboratoriyada DT Prime II 5M1 real-time PCR platforması vasitəsilə urogenital infeksiyalar, HPV, HCV və HBV virus yükünün aşkarlanması istiqamətində müayinələr aparılır.

Molekulyar diaqnostika xidmətlərinin genişləndirilməsi çərçivəsində qadınlarda vaginal mikrobiotanın kompleks qiymətləndirilməsi, bakterial vaginoz və vulvovaginal kandidozla əlaqəli mikroorqanizmlərin aşkarlanmasına imkan verən yeni testlərin tətbiqi planlaşdırılır.

Bununla yanaşı, Chlamydia trachomatis, Neisseria gonorrhoeae, Mycoplasma genitalium, Mycoplasma hominis, Ureaplasma spp. və Trichomonas vaginalis daxil olmaqla, geniş spektrli cinsi yolla ötürülən infeksiyalar panelinin inkişaf etdirilməsi nəzərdə tutulur.

Eyni zamanda, HSV-1/2, CMV, EBV, respirator viruslar və antibiotik rezistentliyi markerləri üzrə müvafiq molekulyar testlərin tətbiqi imkanlarının genişləndirilməsi planlaşdırılır.

Bu istiqamətdə görülən işlər real-time PCR texnologiyasının multiplex və kəmiyyət analiz imkanlarından istifadə etməklə müasir, həssas və spesifik molekulyar diaqnostika xidmətlərinin daha geniş spektrdə təqdim edilməsinə imkan yaradacaq.