Aztibb.az-ın xəbərinə görə, ATU-nun Tədris Cərrahiyyə Klinikasının Plastik cərrahiyyə şöbəsinin müdiri, plastik cərrah Adil Cümşüdovun rəhbərliyi ilə həyata keçirilən əməliyyat zamanı məişət şəraitində motorlu kəsici alətlə xəsarət alan pasiyentin əlində yaranmış mürəkkəb zədələnmələr aradan qaldırılıb.

 

Travma nəticəsində pasiyentin III, IV və V barmaqlarının vətərləri kəsilib, eyni zamanda geniş yumşaq toxuma defekti yaranıb. Barmaqların amputasiyadan xilas edilməsi və funksiyalarının mümkün qədər qorunması məqsədilə kompleks rekonstruktiv cərrahi müdaxilə icra olunub.

 

Əməliyyat zamanı yumşaq toxuma defektinin bərpası üçün flep cərrahiyyəsi, zədələnmiş vətərlərin funksiyasının bərpası məqsədilə vətər transferi həyata keçirilib. Kəsilmiş sinirlərin mümkün olan hissələri isə mikrocərrahi üsulla bərpa edilib. Eyni zamanda toxumaların qan təchizatının yenidən təmin olunması üçün damarların mikrocərrahi rekonstruksiyası aparılıb.

 

A.Cümşüdovun sözlərinə görə, müalicə iki mərhələli şəkildə planlaşdırılıb. Birinci mərhələdə formalaşdırılan flep təxminən üç həftə ərzində əl nahiyəsinə bağlı vəziyyətdə saxlanılacaq. Bu müddətdən sonra ikinci mərhələdə flep ayrılaraq son rekonstruktiv müdaxilə həyata keçiriləcək.

 

Aparılan mürəkkəb rekonstruktiv əməliyyatın əsas məqsədi pasiyentin zədələnmiş barmaqlarını amputasiyadan xilas etməklə yanaşı, əl funksiyasının mümkün qədər bərpa olunmasını təmin etməkdir.