ATU-nun Tədris Cərrahiyyə Klinikasında koronar arteriyaların çoxdamarlı stenozu diaqnozu qoyulan pasiyent üzərində uğurlu aorta-koronar şuntlama əməliyyatı (CABG) həyata keçirilib.

Bu barədə Aztibb.az-a məlumat verən Klinikanın kardio cərrahiyyə şöbəsinin müdiri Mirəli Məcidov bildirib ki, pasiyent bir müddət əvvəl fiziki gərginlik zamanı döş qəfəsində ağrı, təngnəfəslik və tez yorulma şikayətləri ilə klinikaya müraciət edib. Aparılan müayinələr, o cümlədən koronar angioqrafiya nəticəsində koronar arteriyalarda çoxdamarlı stenoz müəyyən edilib.

Pasiyentin vəziyyəti və koronar damarların anatomik xüsusiyyətləri qiymətləndirildikdən sonra cərrahi müalicəyə qərar verilib. Xəstəyə aorta-koronar şuntlama əməliyyatı (CABG) icra olunub. Əməliyyat zamanı ürək əzələsinin qan təchizatının bərpası məqsədilə daralmış koronar damarların distal hissələrinə şuntlar qoyulub.

Mirəli Məcidovun sözlərinə görə, əməliyyat texniki baxımdan uğurla tamamlanıb. Pasiyent əməliyyatdan sonra intensiv terapiya şöbəsində nəzarətdə saxlanılıb, vəziyyəti stabilləşdikdən sonra müvafiq müalicənin davam etdirilməsi üçün palataya köçürülüb.

Hazırda pasiyentin ümumi vəziyyəti qənaətbəxşdir və müalicəsi həkim nəzarəti altında davam etdirilir.