Azərbaycan Tibb Universitetində (ATU) görkəmli dövlət və elm xadimi, professor Əziz Məmmədkərim oğlu Əliyevin 130 illik yubileyinə həsr olunmuş “Əziz Əliyev: Şəxsiyyət, elm və milli səhiyyə irsi – 130” adlı elmi-praktik konfrans keçiriləcək.

ATU-dan Aztibb.az-a bildirilib ki, Azərbaycan Respublikası Prezidentinin 20 avqust 2026-cı il tarixli “Azərbaycanın görkəmli dövlət və elm xadimi Əziz Əliyevin 130 illiyinin qeyd edilməsi haqqında” Sərəncamından irəli gələn tədbirlər çərçivəsində təşkil olunacaq konfrans 17–18 dekabr 2026-cı il tarixlərində baş tutacaq.

Konfransın əsas məqsədi Azərbaycan tibb tarixində özünəməxsus iz qoymuş Əziz Əliyevin elm, səhiyyə, tibb təhsili və ictimai həyatın inkişafında mühüm rolunu, zəngin elmi irsini və milli səhiyyənin formalaşmasına verdiyi töhfələri müasir elmi yanaşmalar əsasında müzakirə etməkdir.

Tədbir çərçivəsində müxtəlif elmi istiqamətləri əhatə edən panellərlə yanaşı, doktorant, magistr, rezident və tələbələrin iştirakı ilə “Əziz Əliyev – 130: Gənc tədqiqatçıların elmi baxışları” adlı xüsusi panelin keçirilməsi də nəzərdə tutulur.

Konfransın materialları elmi məqalə və tezislər toplusu şəklində nəşr ediləcək. Hazırda tezislərin qəbuluna start verilib. Daha ətraflı məlumatı linkə daxil olaraq, əldə etmək mümkündür.