İstanbulda yaşayan 41 yaşlı Mehmet Polat arıqlama, iştahasızlıq və davamlı öskürək kimi şikayətlərlə xəstəxanaya müraciət etdikdən sonra ağciyərində sümük olduğu aşkarlanıb. Sümük uğurlu əməliyyat nəticəsində çıxarılıb. O, başına gələnlərlə bağlı “Sümüklü yeməkləri sevən adamam, buna görə çox da təəccüblənmədim...” deyib.

Aztibb.az "Milliyyet"ə istinadən yazır ki, döş qəfəsi cərrahiyyəsi üzrə mütəxəssis dosent Onur Derdiyok və onun rəhbərlik etdiyi komandanın apardığı müayinələr zamanı xəstənin ağciyərində şübhəli sahə müəyyən edilib. Bundan sonra tənəffüs yollarının ağız boşluğundan daxil edilən kamera vasitəsilə müayinə olunmasına imkan verən bronxoskopiyanın aparılmasına qərar verilib.

Bronxoskopiya və laborator müayinələr nəticəsində dəqiq nəticə əldə olunmadıqdan sonra tibbi konsiliumun qərarı ilə VATS – video-yardımlı döş qəfəsi cərrahiyyəsi üsulundan istifadə edilib. Bu, kiçik kəsiklər vasitəsilə kamera və xüsusi cərrahi alətlərdən istifadə olunmaqla həyata keçirilən qapalı əməliyyat üsuludur.

Əməliyyat zamanı aparılan sürətli patoloji müayinə nəticəsində xəstədə xərçəng olmadığı müəyyənləşdirilib. Şikayətlərin səbəbinin isə ağciyərdə yerləşən sümük olduğu aşkarlanıb. Sümük və onun ətrafında əmələ gəlmiş toxuma cərrahi yolla çıxarılıb.

Dosent Onur Derdiyok xəstənin vəziyyəti və əməliyyatın gedişi barədə məlumat verərək bildirib ki, insanlar uzun müddət davam edən və təkrarlanan şikayətlərini diqqətdən kənarda qoymamalıdırlar. O, vətəndaşları sağlamlıqları ilə bağlı davamlı narahatlıq yaradan hallarda vaxtında həkimə müraciət etməyə çağırıb.