Rusiya alimləri çaytikanının yarpaqlarında olan təbii kazuariktin birləşməsinin xərçəng hüceyrələrinin inkişafını dayandırdığını müəyyən ediblər.

Aztibb.az xəbər verir ki, bu barədə "RİA Novosti" məlumat yayıb.

Rusiya Elm və Ali Təhsil Nazirliyindən bildirilib ki, çaytikanının bu xüsusiyyəti Ümumrusiya Dərman və Ətirli Bitkilər Elmi-Tədqiqat İnstitutunun alimləri tərəfindən aşkar edilib.

Nazirliyin açıqlamasında qeyd olunub: “Bədxassəli hüceyrələrin metabolik aktivliyi təbii maddənin konsentrasiyasından və təsir müddətindən asılı olaraq azalıb”.

İnstitutun baş elmi işçisi Yelena Jniçkova bildirib ki, kazuariktin şiş hüceyrələrinin inkişafını güclü şəkildə inhibə edən maddədir. Onun sözlərinə görə, bu nəticə gələcəkdə xərçənglə mübarizə vasitələrinin hazırlanması üçün zəmin yarada bilər.

Qeyd edək ki, bundan əvvəl Rusiya Səhiyyə Nazirliyinin N.F. Qamaleya adına Milli Epidemiologiya və Mikrobiologiya Tədqiqat Mərkəzinin elmi rəhbəri Aleksandr Qintsburq yaxın gələcəkdə xərçəngin bir neçə növünün müalicəsində əhəmiyyətli irəliləyiş əldə edilə biləcəyini açıqlamışdı.

Onun sözlərinə görə, bu xəstəliklərə melanoma, kiçik hüceyrəli ağciyər xərçəngi, sidik kisəsi xərçəngi və kolorektal xərçəng daxildir.