Tailanddan olan 46 yaşlı kişi əl barmaqlarındakı qeyri-adi dəyişikliklə əlaqədar həkimə müraciət edib. Bir neçə il ərzində onun barmaqları tədricən qısalaraq enliləşib, lakin bu müddətdə heç bir ağrı hiss etməyib.

Aztibb.az "The New England Journal of Medicine" jurnalına istinadən yazır ki, mütəxəssislərin araşdırması nəticəsində məlum olub ki, pasiyentin uc (distal) falanqalarının sümük toxumasında destruksiya baş verib. Barmaqların ucundakı sümüklərin tədricən rezorbsiyaya uğraması ilə müşayiət olunan bu nadir vəziyyət akroosteoliz adlanır. Müraciətdən on il əvvəl kişiyə böyrək daşları səbəbindən sidik axınının pozulması ilə bağlı xroniki böyrək xəstəliyi diaqnozu qoyulubmuş. Lakin o, mütəmadi həkim nəzarətindən keçməyib.

Müayinə zamanı həkimlər əl barmaqlarının uclarının qısaldığını və toppuzvari forma aldığını müəyyən ediblər. Bənzər, lakin daha zəif nəzərə çarpan dəyişikliklər ayaq barmaqlarında da müşahidə olunub. Rentgen müayinəsi falanqaların uclarındakı sümük sahələrinin demək olar ki, yox olduğunu göstərib. Bundan əlavə, mütəxəssislər sümük sıxlığının azalmasını, damarlarda kalsium çöküntülərini və sümük toxumasında maddələr mübadiləsinin ağır dərəcədə pozulması ilə bağlı digər dəyişiklikləri qeydə alıblar.

Həkimlər akroosteolizin inkişafını ağır böyrək xəstəliyi fonunda yaranan böyrək osteodistrofiyası və qalxanabənzər ətraf vəzilərin fəaliyyətinin pozulması (hiperparatiroidizm) ilə əlaqələndiriblər.

Dializə və aparılan müalicəyə baxmayaraq, qanda kalsiumun səviyyəsi yüksək olaraq qalıb. Üç aydan sonra pasiyentə qalxanabənzər ətraf vəzilərin çıxarılması (paratiroidektomiya) və toxumanın bir hissəsinin autotransplantasiyası əməliyyatı icra edilib.

Cərrahi müdaxilədən altı ay sonra hormon və kalsium göstəriciləri normallaşıb. Bununla belə, barmaq sümüklərinin artıq destruksiyaya uğramış hissələri bərpa olunmayıb.

Sümüklərin və ətrafların nadir xəstəlikləri uzun müddət simptomsuz keçə və yalnız ciddi fəsadlar mərhələsində üzə çıxa bilər. Mütəxəssislər əl və barmaqlardakı dəyişikliklərin əlavə müayinə tələb edən hansı nadir xəstəliklərin əlaməti ola biləcəyini bildirirlər.