ABŞ-li sahibkar və bioloji haker Brayan Conson orqanizmini gənc saxlamaq üçün illər ərzində milyonlarla dollar xərcləsə də, 2026-cı ildə sağalmaz autoimmun qastrit diaqnozu alıb.

Aztibb.az xəbər verir ki, 40 yaşdan sonra həyatını qocalmanı mümkün qədər ləngitmək məqsədinə həsr edən Conson ildə təxminən 2 milyon dollar tibbi müayinələrə, müxtəlif prosedurlara, dərman və əlavələrə sərf edib. O, xüsusi qidalanma, gündəlik məşqlər və ciddi yuxu rejimi ilə yanaşı, müxtəlif eksperimental yanaşmalardan da istifadə edib.

Conson hətta yeniyetmə oğlunun qan plazmasını özünə köçürüb. Lakin mütəxəssislər bu kimi prosedurların gəncləşdirici təsirinin elmi cəhətdən sübut edilmədiyini bildirirlər.

Bioloji hakerlər arasında aralıq oruc, ketogen pəhriz, soyuq terapiyası, hiperbarik kamera, qida əlavələri, müxtəlif dərmanlar və orqanizmin biomarkerlərinin davamlı izlənməsi kimi üsullar geniş yayılıb.

Ekspertlərin fikrincə, uzunömürlülükdə həyat tərzi mühüm rol oynasa da, orqanizmi “yenidən proqramlaşdırmaq” mümkün deyil. Genetik xüsusiyyətlər, ətraf mühit, immun sisteminin fəaliyyəti və digər amillər də insan sağlamlığına təsir göstərir.

Consonda may ayında autoimmun qastrit aşkarlanıb. Bu xəstəlikdə immun sistem mədənin hüceyrələrinə hücum edir və B12 vitamini çatışmazlığı, qanazlığı, eləcə də mədə xərçəngi riskinin artmasına səbəb ola bilər.

Mütəxəssislər vurğulayırlar ki, sağlam və uzun ömür üçün ekstremal bioloji hakerlik üsullarından daha çox balanslı qidalanma, fiziki aktivlik, keyfiyyətli yuxu, stressin idarə olunması və mütəmadi tibbi müayinələrə üstünlük verilməlidir.