Naxçıvan Dövlət Universitetinin ev sahibliyi və təşkilatçılığı ilə 24–26 sentyabr 2026-cı il tarixlərində “I Naxçıvan Beynəlxalq Tibb Günləri – 2026” keçiriləcək.
Aztibb.az xəbər veri ki, Beynəlxalq elmi tədbir tibb sahəsində bilik və təcrübə mübadiləsinə, beynəlxalq əməkdaşlığın inkişafına, eləcə də müasir diaqnostika və müalicə yanaşmalarının müzakirəsinə həsr olunacaq.
Tədbir çərçivəsində XXIII Avrasiya Qastroenteroloji Cəmiyyəti Konqresi, Cərrahi və Mama-Ginekoloji Problemlərə Multidissiplinar Yanaşmalar üzrə Beynəlxalq Konqres, həmçinin İBH və İntestinal Ultrasonoqrafiya üzrə Beynəlxalq Kurs keçiriləcək.
Proqramda ustad dərsləri, praktiki kurslar, canlı endoskopik və cərrahi nümayişlər, panel müzakirələri, simpoziumlar və elmi təqdimatlar yer alacaq.
Tədbir çərçivəsində qastroenterologiya, onkologiya, urologiya, mama-ginekologiya və ümumi cərrahiyyə sahələri üzrə tanınmış mütəxəssislər tərəfindən xəstələrin qəbulu, müayinəsi və müalicəsinin təşkili də nəzərdə tutulur.
Avropa, Amerika və türkdilli ölkələrdən tanınmış alim və mütəxəssislərin iştirak edəcəyi beynəlxalq tədbirə bütün tibb ictimaiyyəti dəvətlidir.
Tezislərin göndərilməsi üçün son tarix: 30 avqust 2026
E-poçt: forummed4@gmail.com
Əlaqə: +994 55 677 26 29
