Xəstəxanaların təcili yardım şöbələri həyati təhlükəsi olan və ya qəfil səhhəti pisləşən şəxslərə həftənin 7 günü, günün 24 saatı fasiləsiz tibbi yardım göstərən mühüm xidmət bölmələridir. Bu şöbələrin əsas vəzifəsi xəstənin vəziyyətini qısa müddətdə qiymətləndirmək, həyati göstəricilərini sabitləşdirmək, ilkin diaqnozu müəyyənləşdirmək və zəruri müalicəyə başlamaqdır.

Aztibb.az xəbər verir ki, Gəncə Şəhər Birləşmiş Xəstəxanasının nəzdində fəaliyyət göstərən Abbas Səhhət adına Xəstəxananın, Akademik Z.Məmmədov adına Xəstəxananın və Uşaq Xəstəxanasının təcili yardım şöbələri müasir tibbi avadanlıqlarla təchiz olunub. Bu şöbələrdə vətəndaşlara operativ təcili və təxirəsalınmaz tibbi yardım göstərilir.

Şöbələrdə dünya təcrübəsində geniş tətbiq olunan "triaj" (çeşidləmə) sistemi istifadə edilir. Bu sistem xəstələrin vəziyyətinin ağırlıq dərəcəsinə uyğun olaraq prioritetləşdirilməsini təmin edir və onların üç əsas zonaya bölünməsi əsasında fəaliyyət göstərir:

Qırmızı zona – həyatı birbaşa təhlükə altında olan, dərhal reanimasiya və təcili müdaxilə tələb edən xəstələr;
Sarı zona – vəziyyəti ciddi olan, lakin qısa müddət gözləyə bilən xəstələr;
Yaşıl zona – həyati təhlükəsi olmayan, ambulator müalicə və ya planlı tibbi yardım ala biləcək xəstələr.

Qeyd edək ki, triaj sisteminin tətbiqi tibbi personalın işinin daha operativ təşkilinə, vaxt itkisinin minimuma endirilməsinə və ilk növbədə həyati təhlükəsi olan xəstələrə vaxtında yardım göstərilməsinə imkan yaradır. Bu yanaşma kritik vəziyyətdə olan xəstələrin həyatının xilas edilməsində mühüm əhəmiyyət daşıyır.