Tədris Cərrahiyyə Klinikasında anadangəlmə sol üst göz qapağı ptozu (sallanması) diaqnozu olan xəstəyə uğurla cərrahi əməliyyat icra olunub.

Klinikadan Aztibb.az-a verilən məlumata görə, əməliyyat ATU-nun plastik, estetik və rekonstruktiv cərrahiyyə üzrə rezidenti, tibb üzrə fəlsəfə doktoru Dilqam Məhərrəmov tərəfindən həyata keçirilib.

Müalicə olunmamış hallarda isə bu patologiya uşaqlarda ambliopiyaya (tənbəl göz sindromu) və astiqmatizmə səbəb ola bilər ki, bu da vaxtında cərrahi müdaxilənin vacibliyini artırır.

Əməliyyat zamanı levator cərrahiyyəsi yəni levator əzələsinin funksional vəziyyətinə uyğun olaraq qısaldılması və yenidən düzgün mövqedə bərkidilməsi əməliyyatı icra edilib. Dünya təcrübəsində ptozun cərrahi korreksiyasında ən çox tətbiq olunan və effektiv üsullardan biri sayılan bu metod, zəif işləyən əzələnin gücünü bərpa edərək qapağı fizioloji səviyyəyə qaldırmağa imkan verir. Nəticədə ptoz tam aradan qaldırılıb, göz qapağının həm funksiyası, həm də hər iki gözün estetik simmetriyası bərpa olunub.