Çin alimləri diabetin müalicəsi istiqamətində mühüm nailiyyət əldə etsələr də, bu nəticələri hələlik xəstəliyin tam müalicəsi kimi qiymətləndirmək düzgün olmaz.

Aztibb.az "Fitakademy" sosial platformasının məlumatına istinadən yazır ki, tədqiqat çərçivəsində 1-ci tip diabetdən əziyyət çəkən 25 yaşlı qadının hüceyrələri yenidən proqramlaşdırılaraq insulin ifraz edən hüceyrələrə çevrilib və daha sonra yenidən orqanizminə köçürülüb.

Transplantasiyadan 75 gün sonra pasiyent artıq insulin inyeksiyalarına ehtiyac duymayıb və qan şəkərinin səviyyəsi ən azı bir il ərzində sabit qalıb.

Oxşar müsbət nəticələr 2-ci tip diabetli bir pasiyentdə də müşahidə edilib.

Bununla belə, mütəxəssislər vurğulayırlar ki, bunlar hələlik yalnız ayrı-ayrı klinik hallar və erkən mərhələli tədqiqatların nəticələridir. Metodun milyonlarla pasiyent üçün nə dərəcədə təhlükəsiz və effektiv olduğu hələ məlum deyil.

Hazırda bu yanaşma hazır müalicə üsulu hesab edilmir. Bununla belə, o, gələcəkdə diabet xəstələrinin gündəlik insulin inyeksiyalarından asılılığını azaltmağa və ya aradan qaldırmağa yönəlmiş ən perspektivli elmi istiqamətlərdən biri kimi qiymətləndirilir.