Onilliklər ərzində böyrək xəstəlikləri geri dönməyən və tədricən irəliləyən hüceyrə zədələnməsi kimi qəbul olunurdu. Mövcud müalicə üsulları xəstəliyin gedişatını yalnız ləngidə bilir, lakin zədələnmiş toxumanı tam bərpa etmək mümkün olmurdu.

Aztibb.az "Labmedya" nəşrinə istinadən yazır ki, indi isə alimlər laboratoriya şəraitində apardıqları yeni tədqiqatlarda böyrək toxumasının hüceyrə səviyyəsində bərpasına imkan verə biləcək perspektivli yanaşma təqdim ediblər.

Siçanlar üzərində aparılan araşdırmalar göstərib ki, yeni metod böyrək zədələnməsini sadəcə yavaşıtmır, həm də toxumalarda baş vermiş dəyişiklikləri qismən geri çevirərək orqanın funksiyalarının bərpasına kömək edir.

Tədqiqatın müəlliflərinin sözlərinə görə, bu təsir böyrək toxumasında çapıqlaşmaya və bərpa prosesinin pozulmasına səbəb olan molekulların hədəflənməsi sayəsində əldə olunur. Əvvəllər geri dönməz hesab edilən toxuma zədələnmələrinin bu molekulyar müdaxilə vasitəsilə bərpa oluna bilməsi alimlər tərəfindən mühüm elmi nailiyyət kimi qiymətləndirilir.

Mütəxəssislər hesab edirlər ki, əgər bu mexanizmin insanlarda da effektiv və təhlükəsiz olduğu təsdiqlənərsə, gələcəkdə xroniki böyrək xəstəliklərinin müalicəsində yeni dövr başlaya bilər. Bu, dializ və böyrək transplantasiyasına ehtiyacın azalmasına, müalicə yanaşmalarının isə köklü şəkildə dəyişməsinə zəmin yarada bilər.

Bununla belə, alimlər vurğulayırlar ki, əldə olunan nəticələr hələlik yalnız laboratoriya və heyvan modellərində aparılmış tədqiqatlara əsaslanır. Yeni üsul insanlar üzərində klinik sınaqlardan keçməyib və onun təhlükəsizliyi ilə effektivliyinin təsdiqlənməsi üçün genişmiqyaslı klinik araşdırmalara ehtiyac var.

Buna baxmayaraq, mütəxəssislər bu nəticələrin xroniki böyrək xəstəliklərinin gələcəkdə tam müalicə oluna biləcəyi ilə bağlı indiyədək əldə edilmiş ən ümidverici elmi nailiyyətlərdən biri olduğunu bildirirlər.