Hindistanda fəaliyyət göstərən tədqiqatçılar insan beyin kötüyünün indiyədək hazırlanmış ən detallı üçölçülü atlasını yaradıblar.

Aztibb.az BBC-nin məlumatına istinadən yazır ki, Hindistanın Sudha Gopalakrishnan Beyin Mərkəzinin (SGBC) alimləri insan beyin kötüyünün neyrokimyəvi xarakterizasiya atlasının (ANCHOR) hazırlanması üzrə genişmiqyaslı tədqiqat aparıblar.

Layihə çərçivəsində 20 alim 18 ay ərzində beynin 200-dən çox kəsiyini tədqiq edib. Maqnit-rezonans tomoqrafiyası (MRT) görüntüləri mikroskopik anatomiyanın üçölçülü rekonstruksiyası ilə birləşdirilərək vahid rəqəmsal atlas hazırlanıb.

Tədqiqat zamanı döl, uşaq və yetkin insan beyinlərinə aid 500-dən çox toxuma nümunəsi bir araya gətirilərək insan beyin kötüyünün dünyada ən ətraflı 3D atlası yaradılıb.

Hazırlanan rəqəmsal atlas sayəsində həm beynin ümumi quruluşunu, həm də ayrı-ayrı sinir hüceyrələrini yüksək dəqiqliklə araşdırmaq mümkündür. Atlas vasitəsilə 200-dən çox beyin hüceyrəsi qrupu və sinir yolu ətraflı şəkildə öyrənilə bilir.

Beyni onurğa beyni ilə birləşdirən, tənəffüs, ürək fəaliyyəti, yuxu, oyaqlıq və hərəkət funksiyalarını tənzimləyən beyin kötüyünün bu səviyyədə xəritələndirilməsi Alzheimer, Parkinson xəstəliyi və insult kimi nevroloji xəstəliklərin mexanizmlərinin daha dərindən öyrənilməsinə və gələcəkdə yeni diaqnostik və müalicə yanaşmalarının inkişafına töhfə verə bilər.

Tədqiqatın nəticələri "BioRxiv" elmi platformasında dərc olunub.