Azərbaycan Tibb Universitetinin (ATU) rektoru, professor Gəray Gəraybəyli Türkiyənin Nişantaşı Universitetinin rektoru, professor Şenay Yalçın və rektorun müşaviri Sibel Baykutla görüşüb.

Görüşdə Azərbaycan-Türkiyə qardaşlığının sarsılmaz olduğuna diqqət çəkən G.Gəraybəyli Vətən müharibəsi zamanı Türkiyənin Azərbaycana əsl qardaşlıq nümunəsi göstərməsi, daima mənəvi dəstək olduğunu vurğulayıb.

Rektor son illər ölkəmizdə elmin, təhsilin və səhiyyənin inkişafından, o cümlədən ATU-nun fəaliyyəti və beynəlxalq əlaqələrindən bəhs edib. G.Gəraybəyli ATU-nun Türkiyənin 23 universiteti ilə əməkdaşlıq etdiyini bildirib. O, Nişantaşı Universiteti ilə əlaqələrdən də danışaraq, birgə fəaliyyətin davam etdiriləcəyini vurğulayıb.

Sonra çıxış edən professor Şenay Yalçın ölkələrimiz arasında siyasi, iqtisadi, təhsil, mədəniyyət və digər sahələrdə əlaqələrin inkişaf etdiyini söyləyib. O, təmsil etdiyi qurumun fəaliyyəti barədə ətraflı məlumat verərək, Nişantaşı Universitetində 112-ə yaxın fərqli diplom proqramlarının olduğunu bildirib. Qeyd edib ki, universitetdə mühəndislik, memarlıq, iqtisadiyyatla yanaşı, əczaçılıq, diş həkimliyi, tibb fakültələri, fizoterapiya, qidalanma və digər proqramlar mövcuddur. Bu ildən isə tibb bacısı ixtisası üzrə təhsilə start verilir.

Görüşdə ATU ilə Nişantaşı Universiteti arasında əlaqələrin daha da inkişaf etdirilməsi istiqamətində fikir mübadiləsi aparılıb. Türk dünyası universitetlərinin əməkdaşlığının genişləndirilməsi, perspektivləri müzakirə olunub.

Sonda tərəflər arasında əməkdaşlıq memorandumu imzalanıb.‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬‬

Sənəddə müştərək layihələr, tələbə mübadilə proqramlarda iştirak, beynəlxalq standartlara uyğun tədrisin təmini üçün birgə təlimlərin təşkili və digər məsələlərlə bağlı fəaliyyətlər nəzərdə tutulub.