Kanadanın Kalqari Universitetinin alimləri tərəfindən aparılan  yeni araşdırma göstərib ki, B3 vitamini (niasin) yüksək dozada istifadə edildikdə qlioblastomanın müalicəsində ümidverici nəticələr verə bilər.

Aztibb.az "Journal of Neuro-Oncology" jurnalında dərc olunan tədqiqata istinadən xəbər verir ki, qlioblastoma böyüklərdə rast gəlinən ən aqressiv bədxassəli beyin şişlərindən biri hesab olunur və müalicə zamanı xəstələrə adətən cərrahi əməliyyat, ardınca isə kimya və şüa terapiyası tətbiq edilir. Buna baxmayaraq, xəstəlik əksər hallarda yenidən inkişaf edir. Mütəxəssislərin məlumatına görə, diaqnoz qoyulduqdan sonra xəstələrin orta yaşam müddəti təxminən 15 ay təşkil edir.

Tədqiqat müəllifləri şiş hüceyrələrinin özlərini qorumaq üçün fəaliyyətini zəiflətdiyi immun hüceyrələrini yenidən aktivləşdirməyin yollarını araşdırırlar. Daha əvvəl heyvanlar üzərində aparılan eksperimentlər göstərmişdi ki, niasin bu immun hüceyrələrinin fəaliyyətini bərpa edə bilir.

Klinik sınaqda ilk dəfə qlioblastoma diaqnozu qoyulmuş 24 xəstə iştirak edib. Onlara standart kimya-şüa terapiyası ilə yanaşı, tədricən təsir göstərən niasin preparatı verilib.

Alimlər əvvəlcədən müəyyən etmişdilər ki, əgər altı ay sonra xəstələrin 20 faizindən azında xəstəliyin irəliləməsinin qarşısı alınarsa, tədqiqat dayandırılacaq. Lakin əldə olunan nəticələr gözləntiləri xeyli üstələyib. Belə ki, iştirakçıların 82 faizində altı ay ərzində şişin irəliləməsi müşahidə olunmayıb.

Bununla belə, tədqiqatçılar xəbərdarlıq edirlər ki, yüksək dozada niasinin həkim nəzarəti olmadan qəbul edilməsi təhlükəli ola bilər. Bu vitaminin yüksək dozaları toksik təsir göstərə və ciddi yan təsirlərə səbəb ola bilər.

Hazırda tədqiqat davam edir. Alimlər ümumilikdə 48 xəstənin sınağa cəlb olunmasını planlaşdırırlar. Araşdırmanın yekun nəticələrinin 2026-cı ilin sonu və ya 2027-ci ilin əvvəlində açıqlanacağı gözlənilir.