Azərbaycan səhiyyə sistemi süni intellekt texnologiyalarının tətbiqi üzrə formalaşma mərhələsindədir və bu proses rəqəmsal transformasiyanın tərkib hissəsi kimi qiymətləndirilir. Dünyada sürətlə inkişaf edən bu texnologiyalar artıq diaqnostika, xəstəliklərin erkən aşkarlanması, tibbi görüntülərin təhlili və klinik qərarvermənin dəstəklənməsi kimi sahələrdə geniş istifadə olunur.

Aztibb.az yerli KİV-ə istinadən yazır ki, Səhiyyə Nazirliyi mətbuat katibi Elvin Hacıyevin sözlərinə görə, ölkədə həyata keçirilən rəqəmsallaşma layihələri süni intellektin tətbiqi üçün mühüm baza formalaşdırır. Onun sözlərinə görə, elektron səhiyyə sistemləri, vahid məlumat platformaları və rəqəmsal xidmətlər böyük həcmdə tibbi məlumatların emalına şərait yaradır.

Qurum rəsmisi əlavə edib ki, bu infrastruktur gələcəkdə süni intellekt alqoritmlərinin səhiyyədə daha geniş tətbiqini mümkün edəcək və diaqnostika, proqnozlaşdırma, klinik qərarvermə kimi sahələrdə effektivliyi artıracaq.

Eyni zamanda TƏBİB xətti ilə həyata keçirilən layihələr də süni intellektin səhiyyəyə inteqrasiyasını sürətləndirməyə yönəlib. Məqsəd yalnız rəqəmsallaşma deyil, həm də məlumatlara əsaslanan daha ağıllı səhiyyə modelinə keçidin təmin edilməsidir.