Türkiyədə 43 yaşlı Aydın Özçəlik 9 ay əvvəl qəfil səhhətinin pisləşməsi nəticəsində aorta damarının cırılması diaqnozu ilə ağır vəziyyətdə xəstəxanaya çatdırılıb. İlk əməliyyatdan sonra uzun müddət müalicə alan xəstənin vəziyyəti tam stabilləşmədiyindən ona yenidən mürəkkəb ürək-damar əməliyyatı aparılması zərurəti yaranıb.

Aztibb.az "Medimagazin"ə istinadən yazır ki, Qaziantep Şəhər Xəstəxanasında həyata keçirilən və təxminən 10 saat davam edən əməliyyat zamanı xəstənin aorta qapağı və zədələnmiş damarları bərpa olunub, eyni zamanda 90 santimetr uzunluğunda süni damar implantasiya edilib. Əməliyyatda müasir “Hybrid Frozen Elephant Trunk” texnikasından istifadə olunub.

Ürək-damar cərrahı Yusuf Çorbacıoğlu bildirib ki, xəstədə aortanın ürəyə yaxın hissəsində, beyinə və daxili orqanlara gedən damarlarda ciddi cırılmalar aşkar edilib. Buna görə də aorta kökündən başlayaraq, aorta qapağı da daxil olmaqla demək olar ki, bütün aortanın dəyişdirilməsi zəruri olub. Əməliyyatın bir hissəsi açıq cərrahi üsulla, digər hissəsi isə angioqrafik müdaxilə vasitəsilə icra edilib.

Xəstəxananın baş həkimi Ahmet Uluşan qeyd edib ki, bu əməliyyat regionda ilk dəfə tətbiq edilən mürəkkəb hibrid üsullardan biridir və nəticələri tibbi ədəbiyyata daxil edilə biləcək nadir klinik hallardan sayılır.

Əməliyyatdan sonra sağlamlığına qovuşan Aydın Özçəlik bildirib ki, hipertoniya fonunda baş verən aorta cırılması onun həyatını təhlükə altına salıb. Təkrar əməliyyat zamanı mexaniki ürək qapağı və süni damar yerləşdirilib, boyun damarlarında da bərpaedici müdaxilələr aparılıb. O, hazırda özünü yaxşı hiss etdiyini və həkimlərə minnətdar olduğunu vurğulayıb.