20 mindən çox pasiyentin məlumatlarının təhlili göstərib ki, kəllə-beyin travması keçirmiş şəxslər ümumi əhali ilə müqayisədə beyin xərçəngindən 1,75 dəfə daha çox vəfat edirlər. Tədqiqat ABŞ-ın 20 reabilitasiya mərkəzinin, o cümlədən Spaulding Rehabilitation Hospitalın 1987–2024-cü illəri əhatə edən məlumatlarına əsaslanıb və nəticələr yaş, cins, irq və müşahidə ili üzrə düzəliş edilib.

Aztibb.az "Medical Xpress"in məlumatına istinadən yazır ki, tədqiqat kəllə-beyin travmasının beyin xərçəngindən ölüm riskini artırdığını göstərib.

"Mass General Brigham"ın "HealthSpan" laboratoriya rəhbəri Daniel Daneşvar bildirib ki, kəllə-beyin travması təkcə kəskin hadisə deyil, uzunmüddətli nevroloji və onkoloji nəticələrə səbəb ola bilər və bu barədə həm həkimlər, həm də pasiyentlər məlumatlı olmalıdır.

Ən yüksək risk güllə yarası almış şəxslərdə qeydə alınıb ki, bu qrupda beyin xərçəngindən ölüm riski 14 dəfədən çox yüksək olub. Yüngül ağırlaşmış kəllə-beyin travması olanlarda risk təxminən 4 dəfə artıb, orta və ağır travmalarda isə artım müşahidə olunsa da, statistik baxımdan tam təsdiqlənməyib.

Tədqiqatçılar bu əlaqəni travma zamanı yaranan uzunmüddətli neyroiltihab prosesi ilə izah edirlər. Onların fikrincə, nəticələr klinik təlimatların dərhal dəyişdirilməsi üçün kifayət etməsə də, xüsusilə risk qruplarında onkoloji skrininq proqramlarının hazırlanması üçün əsas yaradır.