15 may 2026-cı il tarixində Dövlət Gömrük Komitəsinin Tibbi Xidmət İdarəsinin, Mərkəzi Gömrük Hospitalının Elmi-Təcrübi və Tədris Mərkəzinin, Azərbaycan Tibb Universitetinin, Azərbaycan Toksikoloqlarının Dərnəyinin və Azərbaycan Reanimatoloqlar və Anestezioloqlar Cəmiyyətinin birgə təşkilatçılığı ilə “Təcili allerqologiya və kəskin toksiko-allergik vəziyyətlər: diaqnostika və müalicəyə müasir yanaşmalar” mövzusunda elmi-praktiki simpozium keçiriləcək.

Hospitaldan Aztibb.az-a verilən xəbərə görə, simpozium çərçivəsində Milli Onkologiya Mərkəzinin Reanimasiya şöbəsinin müdiri Nərminə Əzizova “Anafilaksiya zamanı təcili tibbi yardımın göstərilməsinin müasir alqoritmləri” mövzusunda məruzə ilə çıxış edəcək.

Məruzədə anafilaksiyanın erkən tanınması, həyati təhlükə yaradan ağırlaşmaların qarşısının alınması, təcili tibbi yardımın mərhələli təşkili və beynəlxalq protokollara əsaslanan müasir müdaxilə alqoritmləri haqqında ətraflı məlumat təqdim olunacaq. Təqdimat zamanı klinik praktikada rast gəlinən çətin hallar və intensiv terapiya yanaşmaları da müzakirə ediləcək.

Mərkəzi Gömrük Hospitalının akt zalında həyata keçirilməsi planlaşdırılan Elmi Simpoziumda “Ağır allergik və toksiko-allergik sindromlar: diaqnostika, klinika və müalicə alqoritmi” və “Allergik və toksiko-allergik vəziyyətlər: xüsusi hallar və onların terapevtik strategiyaları” başlıqlı 2 paneldə ümumilikdə 9 məruzə dinləniləcək. Simpozium panel müzakirələr və sual-cavab sesiyaları vasitəsilə interaktiv şəklində həyata keçiriləcək.

Simpozium proqrama uyğun olaraq xüsusilə allerqoloqlar, toksikoloqlar, anestezioloq-reanimatoloqlar, terapevtlər, pediatrlar və təcili tibbi yardım həkimləri üçün nəzərdə tutulmuşdur.

Simpoziumun Səhiyyə Nazirliyinin Elmi Tibbi Şurası tərəfindən akkreditasiya edilərək 4 DTT balı ilə qiymətləndirilmişdir.

Yerlər məhdud olduğu üçün qeydiyyatdan keçmək mütləqdir!

Simpoziumda iştirak ödənişsizdir. Yalnız region tibb işçiləri simpoziuma onlayn şəkildə qoşula bilərlər.

Qeydiyyat linki: https://forms.gle/8NdBeH7eTSmrMa2Y9