TƏBİB-in təşkilatçılığı ilə 21 iyul 2025-ci il tarixində saat 10:00–18:30 aralığında Qazax Rayon Mərkəzi Xəstəxanasında Şəmkir-Tovuz tibbi ərazi bölmələri (TƏB) üzrə fəaliyyət göstərən ailə həkimləri, cərrahlar, terapevtlər və təcili yardım tibb bacıları üçün “Kəskin qarın hallarının idarə olunmasında komanda yanaşması: triajdan çevik müdaxiləyə” mövzusunda seminar keçiriləcək.

Aztibb.az bu barədə TƏBİB-ə istinadla xəbər verir.

“Qlobal cərrahiyyə 2030” proqramının rəhbəri və TƏBİB-in İcraçı direktorunun müşaviri Vüqar Yaqublunun iştirakı ilə baş tutacaq seminarın məqsədi müxtəlif ixtisas sahibləri arasında multidisiplinar əməkdaşlığı gücləndirmək, “kəskin qarın” hallarının vaxtında və düzgün diaqnostikasını, optimal yönləndirilməsini və uyğun tibbi müdaxilələrin həyata keçirilməsini təmin edən vahid idarəetmə sisteminin formalaşdırılmasıdır.

Eyni zamanda, bu tədbir tibb işçilərinin davamlı tibbi təhsilini dəstəkləməklə onların elmi və peşəkar inkişafına töhfə verəcək.

Qeyd edək ki, tədbirin Səhiyyə Nazirliyinin Elmi-Tibbi Şurası tərəfindən akkreditasiyası planlaşdırılır.