ABŞ-ın Massaçusets Texnologiya İnstitutunun (MIT) alimləri süni intellektin imkanlarını bir addım daha irəli apararaq 3D modellərə təkcə görüntü deyil, toxunma hissi də qazandıran yeni sistem - "TactStyle"ı yaradıblar.
Aztibb.az-ın məlumatına görə, yeni texnologiya 3D modellərin vizual və toxunma xüsusiyyətlərini birləşdirərək dizaynerlər, mühəndislər, təhsil sahəsində çalışanlar üçün tamamilə fərqli və interaktiv təcrübə təqdim edir. Sistem istifadəçiyə təkcə obyektin forması və rəngini deyil, həm də səthinin toxunma xüsusiyyətlərini - məsələn, hamarlığı, kobudluğu və ya material hissini - bir şəkil əsasında modelləşdirməyə imkan verir. Bu sistem teksturanın mikrosəviyyəli detalları, yəni səthin "hündürlük xəritəsi"ni süni intellektin gücü ilə şəkildən avtomatik generasiya edir.
Aparılmış psixofiziki sınaqlar da təsdiq edir ki, yeni texnologiya sənaye dizaynı, təhsil, prototipləşdirmə və aksesuar istehsalı kimi sahələrdə inqilabi dəyişikliklər yarada bilər. MIT komandası gələcəkdə texnologiyanı daha da təkmilləşdirməyi planlaşdırır.
