TƏBİB ahıl və həssas qruplara daxil olan şəxslərin, uşaq, hamilə və zahı qadınların yerində müşahidəsini aparmaq, tibbi xidmətlərə əlçatanlığı təmin etmək, o cümlədən icbari tibbi sığortanın yaratdığı imkanlar çərçivəsində təqdim olunan xidmətlərlə bağlı maarifləndirmə işinin gücləndirilməsinə dəstək məqsədilə kənd yerlərində tibbi müayinə tədbirlərini davam etdirir.

Oğuz Rayon Mərkəzi Xəstəxanasının həkim və tibb işçilərindən ibarət səyyar briqada tərəfindən rayonun Muxas kənd sakinlərinin tibbi müayinəsi həyata keçirilib.

Xəstəxanadan Aztibb.az-a bildirilib ki, müayinələrə 50-si uşaq, 15 nəfəri isə 18 yaşdan yuxarı şəxslər olmaqla, ümumilikdə 65 nəfər cəlb edilib. Sakinlərə ümumilikdə icbari tibbi sığortanın Xidmətlər Zərfi çərçivəsində 100-dən çox tibbi xidmət göstərilib.

Müayinələr Oğuz Rayon Mərkəzi Xəstəxanasının tabeliyində fəaliyyət göstərən və əsaslı təmir olunmuş Muxas Kənd Həkim Məntəqəsində icra edilib.

Tibbi müayinələr zamanı müxtəlif ixtisaslı həkimlər tərəfindən vətəndaşlara terapevtik, pediatrik, kardioloji, nevroloji, oftalmoloji xidmətlər göstərilib, həmçinin kənd sakinlərinin ultrasəs müayinəsi (USM) həyata keçirilib.

Müayinələr zamanı xəstəlik aşkarlanan sakinlər ixtisaslı tibb müəssisələrinə yönləndirilib.

Bununla yanaşı, müayinələrə cəlb edilən vətəndaşlarla müxtəlif xəstəliklər və tibbi problemlər barədə maarifləndirici profilaktik söhbətlər aparılıb.