TƏBİB-in təşkilatçılığı və İcbari Tibbi Sığorta üzrə Dövlət Agentliyinin dəstəyi ilə "TƏBİB-in İxtisas gündəliyi - 2025" proqramı çərçivəsində Ümumdünya Böyrək Gününə həsr edilən “Böyrək sağlamlığı həftəsi” layihəsi icra olunacaq.

 

Bu barədə Aztibb.az TƏBİB-ə istinadla xəbər verir.

 

11-12 mart tarixlərində Qəbələ Rayon Mərkəzi Xəstəxanasında böyrək xəstəlikləri və ağırlaşmalarından əziyyət çəkən vətəndaşlara Bakı və Sumqayıt şəhərlərində, habelə Abşeron rayonunda yerləşən TƏBİB-in tabeli tibb müəssisələrində fəaliyyət göstərən uzman və ixtisaslı həkimlər (nefroloq, uroloq, ginekoloq, endokrinoloq, terapevt və pediatr) tərəfindən tibbi xidmətlər göstəriləcək.

 

13 mart tarixində isə Qəbələ rayonunda Qəbələ, Oğuz, Şəki, Balakən, Qax, Zaqatala rayonlarında yerləşən tibb müəssisələrinin həkim heyəti üçün seminarların təşkili, həmçinin vətəndaşların maarifləndirilməsi tədbirlərinin həyata keçirilməsi nəzərdə tutulub.

 

Qəbələ, Oğuz, Şəki, Balakən, Qax və Zaqatala rayonlarının vətəndaşları tibbi müayinələrdən yararlanmaq üçün adıçəkilən tibb müəssisələrinin Qeydiyyat bölməsinə müraciət etməlidir.