Rezidenturaya qəbul imtahanının 1-ci mərhələsinin (baza fənləri üzrə biliklərin qiymətləndirilməsi imtahanının) 2-ci cəhdində iştirak etmək üçün namizədlərin qeydiyyatı davam edir.
Aztibb.az-a Dövlət İmtahan Mərkəzindən bildirilib ki, xarici ölkələrdə ali təhsil almış və Elm və Təhsil Nazirliyi tərəfindən verilən ixtisasın tanınmasını və ekvivalentliyinin müəyyən olunmasını təsdiqləyən sənədləri əldə etmiş və müvafiq məlumatları Elm və Təhsil Nazirliyinin məlumat bazasında olan namizədlər qəbul imtahanında iştirak etmək üçün ərizə qəbulu müddətində Mərkəzin rəsmi internet saytında “Namizədin elektron ərizəsi”ni doldurmalı və özləri təsdiq etməlidirlər.
Hazırda xarici ölkələrdə ali təhsil alan və əsas (baza ali) tibb təhsilinin III kursunu tam bitirmiş tələbələrə də baza fənləri üzrə biliklərin qiymətləndirilməsi imtahanında iştirak etmək hüququ verilir. Bu kateqoriyaya aid olan şəxslər müəyyən edilmiş müddətdə Mərkəzin rəsmi internet saytında “Namizədin elektron ərizəsi”ni doldurmalı və əsas (baza ali) tibb təhsilinin III kursunu tam bitirmələri haqqında ali təhsil müəssisəsi tərəfindən verilmiş rəsmi arayışın notarial qaydada təsdiq edilmiş Azərbaycan dilinə tərcüməsini Sənəd Qəbulu Komissiyasına şəxsən təqdim etməklə ərizələrini təsdiq etdirməlidirlər (Ünvan: Bakı şəhəri, Həsən Əliyev küçəsi, 299). Komissiya hər gün (şənbə, bazar və bayram günləri istisna olmaqla) saat 10:00-dan 17:00-dәk fəaliyyət göstərir.
Qeyd edək ki, rezidenturaya qəbul imtahanının 1-ci mərhələsinin (baza fənləri üzrə biliklərin qiymətləndirilməsi imtahanının) 2-ci cəhdində iştirak etmək üçün namizədlərin qeydiyyatı mayın 19-u saat 23:59-dək internet vasitəsilə aparılır.
