İlk dəfə olaraq yüksək gəlirli ölkələrdə ürək-damar xəstəlikləri ən çox yayılmış ölüm səbəbləri siyahısında liderliyini itirib.

Aztibb.az xəbər verir ki, amerikalı alim Ceyms Adams “The Guardian”a müsahibəsində bu qlobal dəyişiklikdən danışıb. Mütəxəssisin sözlərinə görə, araşdırma xərçəngin inkişaf etmiş ölkələrin sakinlərinin sağlamlığı üçün əsas təhlükəyə çevrildiyini göstərib.

O, qeyd edib ki, bu nəticələri əldə etmək üçün alimlər 21 ölkədə yaşayan 160 min insan haqqında məlumat toplayıblar. Bu dövlətlər üç kateqoriyaya bölünüb: üç yüksək gəlirli, on bir orta gəlirli və beş aşağı gəlirli. Tədqiqat iştirakçılarının yaşı 35 ilə 70 arasında dəyişib və məlumatlar 1980-2020-ci illər arasında təhlil edilib.

Məlum olub ki, inkişaf etmiş ölkələrdə ümumi ölüm halları orta gəlirli ölkələrlə müqayisədə iki dəfə, seçmədə ən yoxsul ölkələrdən isə dörd dəfə aşağı olub. Alimlər həmçinin qeyd ediblər ki, bəzi ölüm səbəbləri digər ölkələrlə müqayisədə yüksək gəlirli ölkələrdə daha çox olur. Bu, xüsusilə pnevmoniya və xroniki obstruktiv ağciyər xəstəliklərinə aiddir. Həmçinin inkişaf etmiş ölkələrdə xərçəng uzun müddətdir birinci yerdə olan ürək-damar xəstəliklərini qabaqlayaraq, ölümün əsas səbəbi olub.

Bununla belə, C.Adams vurğulayıb ki, qlobal miqyasda ürək-damar xəstəlikləri ölüm hallarının əsas səbəbi olaraq qalır. Bütün ölümlərin təxminən 40 faizi bu xəstəliklərdən qaynaqlanır. Xərçəng ikinci yerdədir və bütün ölümlərin 26 faizini təşkil edir.

Mütəxəssis təklif edib ki, tədqiqatın nəticələri qismən varlı ölkələrin sakinlərinə aşağı gəlirli ölkələrlə müqayisədə ürək problemlərindən daha çox sağ qalmağa imkan verən tibbdəki irəliləyişlərlə izah oluna bilər. Yoxsul ölkələrdə müasir müalicə üsullarına çıxış çox vaxt məhduddur.