Xüsusilə uşaqlarda ən çox görülən xəstəliklərdən biri olan orta qulaq infeksiyası müalicə edilmədikdə eşitmə itkisinə qədər nəticələrə səbəb olur. Orta qulaq infeksiyaları tez-tez yuxarı tənəffüs yollarının infeksiyalarının artdığı payız və qış aylarında müşahidə olunur.

Aztibb.az “TRT Haber”ə istinadən xəbər verir ki, mütəxəssislərin sözlərinə görə, havalar soyuduqca yuxarı tənəffüs yollarının infeksiyalarında ciddi artım müşahidə olunur. Bütün yaş qruplarında görülən bu xəstəlikləri bəzi insanlar asanlıqla sovuşdurarkən, bəzilərində digər xəstəliklərin qapısını açır. Eynilə orta qulaq infeksiyası kimi.

Xüsusilə uşaqlarda çox rast gəlinən bir sağlamlıq problemi olan orta qulaq infeksiyasına laqeyd qalına bilməz. Çünki səbəb olduğu ağrı bir yana, müalicə olunmayan orta qulaq infeksiyası eşitmə itkisinə və hətta meningitə səbəb ola bilər.

Bəs niyə orta qulaq infeksiyası xüsusilə uşaqlarda baş verir?

Marmara Universitetinin professoru Çağatay Öysu bunula bağlı mühüm məqamlara diqqət çəkib: “Uşaqlarda anatomik quruluş fərqinə görə orta qulaq infeksiyasına meylli olurlar. Orta qulağı burnun arxasındakı böyük hissəyə bağlayan boru var. Bu borunun anatomik xüsusiyyətləri uşaqlarda burun və burun keçidlərindəki infeksiyanın daha tez orta qulağa çatmasına səbəb olur və buna görə də daha tez yoluxurlar”.

Həkim xəstəliyin əlamətlərini belə təsvir edib: “Xəstəlik orta qulaq boşluğunda maye toplanması, qulaqda dolğunluq hissi, ağrı, qızdırma və eşitmə itkisi ilə özünü göstərir. Yetkinlər uşaqlar kimi həyatları boyu dəfələrlə yuxarı tənəffüs yollarının infeksiyaları ilə qarşılaşırlar. Buna baxmayaraq, orta qulaq infeksiyaları uşaqlarda böyüklərə nisbətən daha çox rast gəlinir”.

Qeyd edib ki, uşaqlarda anatomik quruluş fərqliliyinə görə orta qulaq infeksiyasına meyl var. Orta qulağı burnun arxasındakı böyük hissəyə bağlayan borunun anatomik xüsusiyyətləri uşaqlarda burun və burun keçidlərində olan infeksiyanın orta qulağa daha tez çatmasına imkan verir və buna görə də onlar daha tez yoluxurlar.