Səhiyyə Nazirliyi Respublika QİÇS-lə Mübarizə Mərkəzinin (RQMM) təşəbbüsü, Təhsil Nazirliyinin Şirvan-Salyan Regional Təhsil İdarəsinin dəstəyi ilə Salyan rayonundakı 1 məktəb liseyin, 4 tam orta məktəbin şagirdləri üçün “Sağlam gənclik – sağlam gələcək” adlı maarifləndirmə aksiyaları keçirilib.

Bu məlumat Aztibb.az-a RQMM-dan verilib.

“Uşaq hüquqları aylığı” çərçivəsində təşkil olunan, müəllim və X-XI sinif şagirdlərinin iştirak etdiyi tədbirlərdə sağlam həyat tərzi barədə tövsiyyələr verilib.

Tədbirlərdə çıxış edən RQMM-in mütəxəssisləri İnsanın İmmunçatışmazlığı Virusu (İİV) və Qazanılmış İmmun Çatışmazlığı Sindromuna (QİÇS) məktəblilərin anlayacağı tərzdə aydınlıq gətiriblər. Həkimlər gənclər arasında xəstəliyin yayılma təhlükəsini, virusdan qorunmağın yollarını xatırladıb, bu virusa yoluxan insanların immunitetinin kəskin zəifləməsi nəticəsində bir çox xəstəliklərə asanlıqla tutulduğunu diqqətə çatdırıblar.

Şagirdlərə, həmçinin İİV infeksiyasının diaqnostikası, müalicəsi və profilaktikası haqqında ətraflı məlumat verilib, onları maraqlandıran suallar cavablandırılıb.

Məktəblilərə İİV/QİÇS-ə aid broşurlar, bukletlər paylanıb.