Səhiyyə naziri Teymur Musayev Bakıda keçirilən “Medinex” sərgisində çıxışı zamanı ölkəmizdə tibbi sərgilərin 30 ildən artıqdır keçirildiyini deyib.

Aztibb.az xəbər veir ki, nazirin sözlərinə görə, bugünkü sərgidə 10-dan çox ölkədən 100-ə yaxın şirkətin qatıldığı “Medinex” sərgisi artıq 3-cü dəfədir ki, təşkil olunur. “Medinex” sərgisi həm tibb mütəxəssislərinin yeniliklərlə tanışlığı, həm biznes nümayəndələri arasında qarşılıqlı əlaqələrinin inkişafı, həm də hər bir vətəndaşımızın sağlamlığının yaxşılaşdırılması sahəsində davamlı platforma rolunu oynayacaq.

Ölkədə tibb elminin və səhiyyənin inkişafında toxunan Teymur Musayev deyib: “Ölkə rəhbərliyi tərəfindən Səhiyyə Nazirliyinin qarşısında müəyyən olunan əsas vəzifələrdən biri də milli səhiyyə sistemində tibb elminin nailiyyətlərinin tətbiqini təmin etməkdir. Tibb mütəxəssislərimiz əhalinin sağlamlığının yaxşılaşdırılmasına yönəlik fəaliyyətlərində peşəkarlığın artırılmasına xüsusi yer ayırır, bilik və bacarıqlarının səhiyyənin daim yenilənən tələblərinə uyğunlaşdırılması üçün səhiyyə sektorundakı dəyişiklikləri yaxından izləyirlər”.