"Azərbaycan Perinatologiya və Pediatriya Jurnalı"nın 2023-cü il üçün növbəti buraxılışı çapdan çıxıb.

 

Aztibb.az-ın xəbərinə görə, jurnalın yeni sayında ümumilikdə 14 məqalə yer alıb. 

 

Məlumat üçün qeyd edək ki, “Azərbaycan Perinatologiya və Pediatriya Jurnalı” 2013-cü ildən etibarən Azərbaycan Respublikası Səhiyyə Nazirliyinin tövsiyəsi və bilavasitə dəstəyi ilə ildə 2 dəfə olmaqla çap olunur.

 

Jurnalın təsis olunmasında əsas məqsəd müasir dövrdə perinatologiya və pediatriya sahəsində əldə olunan elmi-praktik yeniliklərin və nailiyyətlərin ölkəmizin tibb müəssisələrində çalışan pediatrlar, mama-ginekoloqlar, neonatoloqlar, anestezioloq-reanimatoloqlar, həkim-rezidentlər, tələbələr və digər mütəxəssislərin nəzərinə çatdırmaqdır.

 

Nəşrin redaksiya heyətinə pediatriyanın bütün sahələrini təmsil edən tanınmış alimlər daxildir. Məqalələr məcburi ekspert rəyindən və elmi redaktədən keçir. Azərbaycan Respublikasının Prezidenti yanında Ali Attestasiya Komissiyası rəyasət heyətinin 13 mart 2015-ci il tarixli iclasında (protokol № 05-R) “Azərbaycan Perinatologiya və Pediatriya Jurnalı” Azərbaycan Respublikasında dissertasiyaların əsas nəticələrinin dərc olunması tövsiyə edilən dövri elmi nəşrlərin siyahısına daxil edilib.