Tibbi Ərazi Bölmələrini İdarəetmə Birliyinin (TƏBİB), Almaniyanın Haydelberq Universitetinin Manhaym Klinikasının Cərrahi Mərkəzinin (UMM), Azərbaycan Qastroenterologiya və İnvaziv Endoskopiya Cəmiyyətinin birgə təşkilatçılığı ilə 26-27 iyun tarixlərində ''Kolorektal cərrahiyyədə qabaqcıl texnikalar və perioperativ proseslərin effektiv təşkili'' mövzusunda ustad dərsləri keçiriləcək.

Bu barədə Aztibb.az-a TƏBİB-dən xəbər verilib.

Gənc cərrahlar üçün nəzərdə tutulan və UMM-nin direktoru Kristof Reissfelderin rəhbərlik edəcəyi təlimdə Almaniyada fəaliyyət göstərən cərrahlardan Vüqar Yaqublu, Stefen Seyfred, Rasim Xəlilov, Azərbaycanda çalışan cərrahlardan isə Elşən Qədimov, Elman Əzimov, Alim Əkbərov, Nərgiz Əfəndiyeva məruzəçi qismində çıxış edəcəklər.

TƏBİB-in tabeliyindəki Yeni Klinikada keçiriləcək ustad dərslərinin birinci günündə məruzəçilər ''Kolorektal xərçəngin müayinə və müalicəsi üzrə Fəaliyyətin İcra Təlimatının (FIT) ümumi təqdimi'', ''Kolorektal xərçənglərin profilaktikası və skrininqi'', ''Kolorektal xərçənglərdə diaqnostik alqoritm'', ''Kolorektal cərrahiyyədə xəstələrin əməliyyatönü hazırlığı prinsipləri'' və ''Canlı video əməliyyat nümunəsində kolorektal cərrahiyyədə cərrahi texnika'' təqdimatlarla çıxış edəcək.

Məruzəçilər təlimin ikinci günündə isə ''Xəstələrin əməliyyatdan sonrakı dövrdə onkoloji izlənməsi'', ''Əməliyyatdan sonrakı dövrün effektiv təşkilində ERAS prinsipləri'' və ''Azərbaycan üçün modifə edilmiş ERAS proqramı'' mövzularında təqdimatlar nümayiş etdirəcək.

Təlimdə iştirak etmək istəyən cərrahlar [email protected] elektron poçt ünvanına müraciət edə bilərlər.