15 iyun - Milli Qurtuluş Günü ərəfəsində Xaçmaz Rayon İcra Hakimiyyətinin və Səhiyyə Nazirliyi “Milli Hematologiya və Transfuziologiya Mərkəzi” Publik Hüquqi Şəxsin birgə təşkilatçılığı ilə Xaçmazda qanvermə aksiyası keçirilib.

Xaçmaz Rayon Mərkəzi Xəstəxanasından Aztibb.az-a bildirilib ki, aksiyada Rayon İcra Hakimiyyətinin başçısı Elnur Rzayev, yerli hüquq mühafizə orqanlarının rəhbərləri, idarə, müəssisə, təşkilatların və rayon ictimaiyyətinin nümayəndələri, eləcə də Xaçmaz Rayon Mərkəzi Xəstəxanasının direktoru Səyyaf Tağıyev və xəstəxana əməkdaşları da iştirak ediblər.

Aksiya hemofiliyalı və talassemiyalı xəstələrə, eləcə də qana ehtiyacı olanlara kömək etmək məqsədilə keçirilib.

Tibbi aksiyada 100-dən çox rayon sakini iştirak edib. Xüsusi tibbi briqadanın həkim-hematoloqları tərəfindən donorların sağlamlıq vəziyyəti yoxlanıldıqdan sonra 80 nəfərdən qan götürülüb.

Qeyd edək ki, aksiyanın gələcəkdə də davam etdirilməsi nəzərdə tutulur.