Gömrük əməkdaşları “Qan ver, ümid ol” şüarı altında keçirilən növbəti könüllü qanvermə aksiyasında iştirak ediblər.

Aztibb.az-a bu barədə Mərkəzi Gömrük Hospitalından xəbər verilib.

14 iyun - Ümumdünya Qan Donoru Gününə həsr edilən aksiya Azərbaycan Respublikası Dövlət Gömrük Komitəsinin Tibbi Xidmət İdarəsi və B.Ə.Eyvazov adına Elmi-Tədqiqat Hematologiya və Transfuziologiya İnstitutu Mərkəzi Qan Bankının birgə təşkilatçılığı ilə həyata keçirilib.

Aksiyada Dövlət Gömrük Komitəsi Tibbi Xidmət İdarəsinin rəis müavini İsmayıl Əfəndiyev və B.Ə.Eyvazov adına Elmi-Tədqiqat Hematologiya və Transfuziologiya İnstitutu Mərkəzi Qan Bankının rəhbəri Qumral Ələkbərova qanvermə aksiyasına qoşulan gömrükçülərə minnətdarlıqlarını bildiriblər.

Qanvermə aksiyası zamanı Mərkəzi Qan Bankının tibb briqadasının həkim-hematoloqları hər bir donorun sağlamlıq durumunu qiymətləndirdikdən sonra onlardan qan götürüblər.

Tibbi aksiyada ümumilikdə 150 nəfərdən çox gömrükçü qan verib.