İtaliyanın Milli Tədqiqat Şurasının Bioelmlər və Bioresurslar İnstitutunun professoru Françesko Paoloççi Molekulyar Biologiya və Biotexnologiyalar İnstitutunda (MBBİ) olub.
MBBİ-dən Aztibb.az-a bildirilib ki, AMEA-nın vitse-prezidenti, institutun baş direktoru, akademik İradə Hüseynova qarşılayıb, elmi əməkdaşlığın perspektivləri müzakirə olunub.
Françesko Paoloççi İnstitutun müasir avadanlıqlarla təchiz olunmuş Bioadaptasiya, Bioinformatika, Fotobioenergetika, Hüceyrənin membran sistemləri və Genomun quruluşu və ekspressiyası laboratoriyalarında aparılan elmi işlərlə tanış olub.
Həmçinin alimin iştirakı ilə elmi seminar da keçirilib. Akademik İradə Hüseynova belə tədbirlərin keçirilməsinin gələcək əməkdaşlıq üçün əhəmiyyətini vurğulayıb.
Professor Françesko Paoloççi apardığı elmi işlərin əsas istiqamətləri barədə seminar iştirakçılarına məlumat verib. O qeyd edib ki, hazırda heyvan yemi kimi istifadə olunan paxlalı bitkilərdə proantosianidin biosintezi üzərində genetik nəzarət tədqiq edilir. A. filiculoides bitkisində flavonoidlərin biosintezinin genlərdən və ətraf mühitdən asılılığı öyrənilir.
İtaliyalı alim daha sonra MBBİ əməkdaşlarının suallarını cavablandırıb.