Bu gün dünyada milyonlarla insanı narahat edən görmə problemlərindən biri də miopiyadır, yaxın görmə, uzağı isə bulanıq görmə ilə xarakterizə olunan bu vəziyyət, xüsusilə son illərdə gənclər arasında geniş yayılıb.

Tədris Cərrahiyyə Klinikasının oftalmologiya şöbəsinin müdiri Qurban İsmayılov Aztibb.az-a bildirib ki, müasir tibb bu problemin həllində bir sıra effektiv cərrahi metodlar təklif edir.

“Miopiya gözün optik sisteminin uzunluğu ilə refraksiya gücü arasındakı uyğunsuzluqdan yaranır. Bunun nəticəsində daxil olan işıq şüaları torlu qişanın üzərində deyil, ondan əvvəl fokuslanır və uzaqdakı obyektlər bulanıq görünür”, deyə Qurban İsmayılov qeyd edib.

Şöbə müdiri vurğulayıb ki, hazırda ən çox müraciət olunan üsullardan biri LASIK (Laser-Assisted In Situ Keratomileusis) əməliyyatıdır. Bu zaman lazer vasitəsilə buynuz qişanın forması dəyişdirilərək, işıq şüalarının düzgün fokuslanması təmin edilir. Prosedur ağrısız, sürətli və reabilitasiya dövrü qısa olduğu üçün pasiyentlər arasında populyardır.

Yüksək dərəcəli miopiya hallarında isə fakik intraokulyar linzaların (implant edilən linzalar) tətbiqi daha münasib seçim ola bilər. Bu üsulda gözün öz linzası saxlanılmaqla, əlavə bir linza gözün daxilinə yerləşdirilir.

“Hər pasiyentin göz quruluşu fərqlidir, ona görə də əməliyyatdan əvvəl ətraflı diaqnostik müayinə aparılması vacibdir. Buynuz qişanın qalınlığı, göz təzyiqi və refraksiya dərəcəsi kimi göstəricilər əsasında ən uyğun metod seçilir”, deyə Qurban İsmayılov əlavə edib.