ATU-nun I Cərrahi Xəstəliklər kafedrasının əməkdaşı, Tədris Cərrahiyyə Klinikasının ümumi və kolorektal cərrahı Pərvanə Aydınova tərəfindən doğuşdan sonra yaranmış aralıq deformasiyası və III dərəcəli rektosel diaqnozu ilə müraciət edən pasiyent üzərində cərrahi əməliyyat icra olunub.

Pərvanə Aydınova Aztibb.az-a bildirib ki, pasiyentdə doğuşdan sonra yaranan aralıq nahiyəsinin deformasiyası və III dərəcəli rektosel müəyyən edilib. Eyni zamanda, düz bağırsaqda polip aşkarlanıb.

Əməliyyat zamanı levatoroplastika, aralığın rekonstruksiyası və düz bağırsaqdakı polipin xaric edilməsi həyata keçirilib. Cərrahi müdaxilə nəticəsində aralıq nahiyəsinin anatomik bütövlüyünün və funksional vəziyyətinin bərpasına yönəlmiş müalicə aparılıb.

Pərvanə Aydınova qeyd edib ki, doğuşdan sonra yaranan aralıq deformasiyaları və rektosel xüsusilə doğuşlar arasında qısa müddət olan qadınlarda daha çox müşahidə edilə bilər.

Həkimin sözlərinə görə, bu kimi hallarda pasiyentin şikayətləri, anatomik dəyişikliklərin dərəcəsi və yanaşı problemlər nəzərə alınaraq fərdi müalicə taktikası müəyyənləşdirilir. Cərrahi müalicənin əsas məqsədi çanaq dibi strukturlarının anatomik quruluşunun bərpası və pasiyentin həyat keyfiyyətinin yaxşılaşdırılmasıdır.