Naxçıvan Muxtar Respublikası Səhiyyə Nazirliyinin təşkilatçılığı ilə Şahbuz Rayon Mərkəzi Xəstəxanasının ixtisaslı həkim briqadası tərəfindən əhalinin tibbi xidmətlərə əlçatanlığının artırılması məqsədilə növbəti tibbi müayinə aksiyası keçirilib.
Nazirlikdən Aztibb.az-a bildirilib ki, Şahbuz rayonunun “Aşağı Qışlaq Kənd Tibb Məntəqəsi”ndə təşkil olunan aksiya çərçivəsində müxtəlif ixtisaslar üzrə müayinələr təşkil olunub.
Aksiya zamanı 10 pediatrik, 12 terapevtik, 4 kardiorevmatoloji və 6 laborator müayinə olmaqla, ümumilikdə 32 tibbi müayinə aparılıb.
Müayinələr zamanı vətəndaşlara ixtisaslı həkimlər tərəfindən müvafiq tibbi məsləhətlər verilib, zəruri hallarda müalicə və əlavə müayinələrlə bağlı tövsiyələr təqdim olunub.
Əhalinin sağlamlığının qorunması, xəstəliklərin erkən aşkarlanması və tibbi xidmətlərin bölgələrdə əlçatanlığının təmin edilməsi istiqamətində bu cür tibbi müayinə aksiyalarının keçirilməsi davam etdirilir.
