ATU-nun Urologiya kafedrasının assistenti, Tədris Cərrahiyyə Klinikasının uroloq-cərrahı Reşad Məmmədov klinikada böyrək, sidik axarı və sidik kisəsi daşları ilə müraciət edən xəstələrin müalicəsi barədə Aztibb.az-a məlumat verib.

Həkimin sözlərinə görə, ATU-nun Tədris Cərrahiyyə Klinikasında İcbari Tibbi Sığortanın dəstəyi ilə uroloji daş xəstəliklərinin cərrahi müalicəsi mütəmadi olaraq uğurla həyata keçirilir. Müalicə olunan xəstələr arasında xüsusilə yanaşı xəstəlikləri olan, ağır piylənmədən əziyyət çəkən, eləcə də yaşlı pasiyentlər üstünlük təşkil edir.

“Xəstələrimiz arasında böyrək, sidik axarı və sidik kisəsinin müxtəlif nahiyələrində yerləşən daşlarla müraciət edən pasiyentlər var. Onların bir qismi daşların mürəkkəb yerləşməsi, yanaşı xəstəlikləri və əməliyyat riskinin yüksək olması səbəbindən digər tibb müəssisələrində cərrahi müdaxiləyə götürülməyən xəstələrdir”, – deyə Reşad Məmmədov bildirib.

Uroloq-cərrah qeyd edib ki, belə mürəkkəb klinik halların müalicəsində əsas üstünlüklərdən biri multidissiplinar yanaşmanın tətbiq edilməsidir. Klinikada xəstələrin yalnız uroloji deyil, eyni zamanda anestezioloji, kardioloji və nefroloji vəziyyətlərinin kompleks şəkildə qiymətləndirilməsi və müalicə prosesinin bütün mərhələlərində müvafiq mütəxəssislərin cəlb olunması üçün geniş imkanlar mövcuddur.

“Bu yanaşma yüksək əməliyyat riski olan xəstələrin təhlükəsizliyini təmin etməyə, onların vəziyyətini hərtərəfli qiymətləndirməyə və müalicə prosesini tam şəkildə başa çatdırmağa imkan verir” deyə həkim vurğulayıb.

R.Məmmədov qeyd edib ki, ATU-nun Tədris Cərrahiyyə Klinikasında mürəkkəb uroloji daş xəstəlikləri olan pasiyentlər üçün müasir tibbi imkanlar və müxtəlif ixtisaslı mütəxəssislərin birgə fəaliyyəti əsasında kompleks tibbi xidmət göstərilir.