Pirallahı Tibb Mərkəzində vətəndaşlar üçün oftalmoloji tibbi xidmətlərin əlçatanlığının artırılması istiqamətində yeni imkanlar yaradılıb.
Mərkəzdən Aztibb.az-a verilən məlumata görə, qurumda ilk dəfə göz əməliyyatlarının icrasına başlanılıb.
İlk cərrahi müdaxilə pteriqium diaqnozu ilə müraciət edən pasiyent üzərində uğurla həyata keçirilib. Əməliyyatı həkim-oftalmoloq Gülnar Mirzəyeva icra edib. Hazırda pasiyentin vəziyyəti stabil qiymətləndirilir.
Bununla yanaşı, Pirallahı Tibb Mərkəzində göz daxili inyeksiyalar, katarakta əməliyyatları və digər oftalmoloji cərrahi xidmətlər də göstərilir. Sözügedən tibbi xidmətlər icbari tibbi sığorta çərçivəsində həyata keçirilir.
Pirallahı Tibb Mərkəzində yeni tibbi xidmətlərin yaradılması və inkişaf etdirilməsi, eləcə də keyfiyyətli tibbi yardımın əhali üçün daha əlçatan olması istiqamətində işlər davam etdirilir.
