Azərbaycan Tibb Universiteti (ATU) və Qazaxıstanın Astana Tibb Universiteti arasında imzalanmış əməkdaşlıq memorandumu çərçivəsində 5 qazaxıstanlı tələbə 19 günlük təcrübə keçib.
Aztibb.az-a ATU-dan bildirilib ki, Astana Tibb Universitetinin tələbələri təqvim-mövzu planına uyğun olaraq universitetin İctimai səhiyyə fakültəsinin Qidalanma və tibbi ekologiya, Uşaq-yeniyetmələrin sağlamlığı və əmək sağlamlığı, İctimai sağlamlıq və səhiyyənin təşkili kafedralarında “Mütəxəssis-gigiyenist” ixtisası üzrə təcrübə keçiblər.
Tədris prosesi zamanı tələbələr kafedraların strukturu, tədris olunan fənlər, ölkəmizdə dövlət tərəfindən epidemioloji nəzarətin aparılması, əhalinin sanitar-epidemioloji sağlamlığı sahəsində normativ-hüquqi aktlara riayət olunmasına nəzarətin həyata keçirilməsi qaydaları ilə tanış ediliblər. Həmçinin onlar 80 saylı bağça və 132-134 saylı təhsil kompleksini müayinə edib, Bakı Tikiş Evində əmək şəraiti, Sənaye və İnnovasiyalar üzrə Bakı Dövlət Peşə Təhsil Mərkəzinin kompleks müayinəsi ilə tanış olublar.
Təcrübənin sonunda qonaq tələbələr ATU-nun Beynəlxalq əlaqələr şöbəsinin müdiri, dosent Müşfiq Orucov və İctimai səhiyyə fakültəsinin dekanı, dosent Qalina Qəniyeva tərəfindən qəbul edilib və müvafiq sertifikatlarla təltif olunublar.
