Hamilə qadınlara bütün növ isti prosedurlar (sauna, isti vanna), eləcə də çox isti havalarda çimərlikdə olmaq məsləhət görülmür.

Aztibb.az xəbər verir ki, bu barədə Salyan Rayon Mərkəzi Xəstəxanasının mama-ginekoloqu Fidan Xankişiyeva hamilə qadınların qorunmalı olduğu məqamlarla bağlı məlumat verərkən bildirib.

Onun sözlərinə görə, ananın bədən hərarətinin artması dölün də hərarətinin artmasına səbəb olur. Bu da onun orqanizmində mübadilə prosesinin pozulmasına təsir göstərir.

Həkim qeyd edib ki, belin dar kəmərlər və rezin vasitələrlə sıxılmasına yol verməmək, rezinli corab və qolfiləri geyinməkdən də çəkinmək lazımdır. Onlar damarları sıxaraq ayaqlarda qan dövranının pozulmasına səbəb olur. Nəticədə isə varikoz xəstəliyi inkişaf edə bilər.

"Hamiləlik zamanı oksigenə tələbat artır. Ona görə də gün ərzində 2 saatdan az olmamaqla, nəqliyyatın və səs-küyün intensiv olmadığı ərazilərdə, parklarda və digər yerlərdə gəzmək vacib hesab olunur. Hamilə qadın gün ərzində 10 saatdan az olmayaraq yatmalıdır. Bu dövrdə yuxugətirici dərmanların qəbul edilməsi yolverilməzdir", - deyə Fidan Xankişiyeva bildirib.