İlk dəfə olaraq "sulodexide" aktiv maddəsinin insan damarlarına müsbət təsirini göstərən və ayaqdakı varikoz çapıqlarının müalicəsi ilə bağlı elmi araşdırmanın nəticələri beynəlxalq resenziyalı "Klinik Tibb Jurnalı"nda dərc edilib. 

Aztibb.az medimagazin.com.tr-yə istinadla bildirir ki, Avropa Flebologiya Dərnəyinin İdarə Heyətinin üzvü, ürək-damar cərrahiyyəsi uzmanı, prof. Suat Doğancının rəhbərlik etdiyi tədqiqat qrupu daha əvvəl heyvanlar üzərində sınaqdan keçirilmiş, lakin bu günə qədər insanlar üzərində təsiri bilinməyən "sulodexide" adlı dərman aktiv maddəsini tibbi ədəbiyyata daxil ediblər.

Professor Suat Doğancı "sulodexide"nin qan durulaşdırıcı, damarın daxili səthini əhatə edən endotel hüceyrələrinin funksiyalarını tənzimləyən, eyni zamanda "iltihab əleyhinə" faydalı xüsusiyyətlərə malik olduğunu açıqlayıb: "Bu aktiv maddəni tədqiq etməyimizin əsas səbəbi həmin maddənin COVID-19 epidemiyası zamanı xəstələrə müsbət təsiri oldu. Bu səbəbdən də bunun üzərində işləməyə başladıq. Biz dünyada ilk dəfə olaraq bu aktiv maddənin insan damarlarına necə təsir etdiyini göstərdik".

Uzman həkim aktiv maddənin xalq arasında "varikoz yaraları" kimi tanınan topuq və ayaq ətrafındakı yaraların sağalmasına müsbət təsir etdiyini bildirib.