Bu günlərdə rayonlara yolumuz düşdükdə yol boyu taxıl zəmiləri və yonca sahələrində bitən qanqalın elə yol kənarındaca satıldığına rast gəlirik. Əksər insanlar ondan uzaq dursalar da, qanqalın dadını, xeyrli tərəflərini bilənlər onun yetişmə vaxtını səbirsizliklə gözləyirlər.

Qanqal bitkisi həm xalq, həm də ənənəvi tibdə qaraciyərin fəaliyyətini yaxşılaşdıran, qaraciyəri təmizləyən bitki kimi tanınır və istifadə olunur. İlk dəfə bu Münhen farmasevtik institutunda təsdiq olunub.

Aztibb.az xəbər verir ki, dietoloqların fikrinə görə, hətta arıqlamaq üçün qanqal çayı istifadə olunur. Lakin xroniki mədə-bağırsaq sistemi, ciddi qaraciyər xəstəlikləri olan insanlar üşün bu çay əks göstərişlidir.

Bu bitki ürək, oynaq xəstəlikləri, ateroskleroz, hepatit, öd daşı xəstəliyi, xolesistit (öd kisəsi iltihabı), kolit, babasil, mədə xorası, dəri xəstəlikləri, ginekoloji xəstəliklər, otit, düzbağırsaq çatları zamanı müalicəvi vasitə kimi istifadə olunur.

Qanqal orqanizmi ziyanlı maddələrdən, toksinlərdən təmizləyir, artıq mayeni xaric edir, piylərin parçalanmasını sürətləndirir, iştahanı azaldır.

Qanqaldan dəmləmə, yağ, müalicəvi toz hazırlayırlar. Qanqalın ən xeyirli hissəsi onun toxumlarıdır.