Azərbaycan Tibb Universitetinin (ATU) rektoru, professor Gəray Gəraybəyli 2022-2023-cü tədris ilində dövlət sifarişi üzrə boş qalan yerlərə keçən tələbələrlə görüşüb.

ATU-dan Aztibb.az-a bildirilib ki, son illər universitetdə ödənişli əsaslarla müxtəlif kurslar üzrə təhsil alan tələbələrin bir qisminin dövlət hesabına təhsil almalarına imkan yaradılır. Bu il də akademik göstəriciləri yüksək olan daha 25 tələbə ödənişli əsaslarla təhsildən, dövlət sifarişi əsasında təhsil formasına keçirilib.

Görüşdə professor G.Gəraybəyli yüksək akademik göstəricisi olan tələbələri təbrik edib. Rektor bildirib ki, dövlət sifarişi əsasında təhsil ailələrin maddi yükünü azaldır, tələbənin təhsilə marağını daha da stimullaşdırır.

O, hazırda ATU-da tələbələrin 80 %-inin dövlət hesabına, 20%-inin isə ödənişli əsaslarla təhsil aldığını diqqətə çatdırıb. Qeyd edib ki, dövlət sifarişi əsasında təhsil alan tələbələr arasında müxtəlif səbəblərdən təhsilini saxlayanlar olur. Səhiyyə Nazirliyi və Elm və Təhsi Nazirliyi arasında qarşılıqlı razılığa əsasən boş qalan yerlərə ödənişli əsaslarla oxuyan tələbələrin arasından ən yaxşı akademik nəticəsi olanlar keçirilir. Bu il də tam şəffaf formada aparılan müsabiqə prosesi nəticəsində 25 tələbənin dövlət sifarişi əsasında təhsil formasına keçirilməsi baş tutub”.