ATU-nun Tədris Terapevtik Klinikasında rezidentlər üçün növbəti ənənəvi seminar keçirilib. Seminarın bu dəfəki mövzusu “Ürək tamponadası və ağciyər arteriyasının tromboemboliyası ağciyər adenokarsinomasının ilkin təzahürləri kimi” olub.

 

Bu barədə Aztibb.az-a Tədris Terapevtik Klinikasından məlumat verilib.

 

Tədbirdə məruzə ilə çıxış edən Terapiya şöbəsinin həkim-rezidenti Nailə Əsədullayeva klinikaya müraciət edən və müalicə alan 55 yaşlı qadın xəstənin analizlərinin nəticələri, onların təhlili və müalicəsi haqqında ətraflı məlumat verib.

 

Həkim bildirib ki, xəstə ağır təngənəfəslik, subfebril bədən hərarəti, halsızlıq, iştahanın azalması şikayətləri ilə klinikaya daxil olub. O, özünü pis hiss edərək ürək tamponadası (perikard boşluğunda qan və ya digər mayenin yığılması səbəbindən kəskin ürək çatışmazlığı) diaqnozu ilə təcili xəstəxanaya yerləşdirilib, xəstədə perikardiosentez (perikard boşluğunun punksiyası) aparılıb.

 

Pasiyentin analiz nəticələrinin təhlilindən danışan məruzəçi qeyd edib ki, klinik qan testində leykositoz, neytrofiliya, biokimyəvi qan testində CRP, B 12 vit və D-dimer çox yüksəlmiş, ağciyərlərin KT angioqrafiyasında-plevral maye, ağciyər arteriyasının tromboemboliyası (böyük qan dövranı venalarında və ya sağ mədəcik boşluğunda yaranan, qan axını vasitəsilə kiçik qan dövranına gətirilən tromb hissəcikləri tərəfindən ağciyər arteriya kökünün və ya mənfəzinin tutulması) aşkar olunub, EXOKQ-da perikardial maye AF(atım fraksiyası) 45-48% olub.

 

N. Əsədullayeva qeyd edib ki, daha sonra xəstəyə simptomatik, etiotrop və patogenetik terapiya təyin olunub, müalicə fonunda xəstənin vəziyyəti yaxşılaşıb. Döş qəfəsinin venadaxili kontrastlı KT kontrolda ağciyərin şişi və mediasternal limfa düyünlərinin böyüməsi müşahidə olunub, biopsiyaya əsasən ağciyərlərin adenokarsinoması (bronxial divarın vəzi epitelindən əmələ gələn bədxassəli yenitörəmə) aşkar edilib. Xəstə onkoloqa göndərilib və nəzərəçarpacaq müsbət effekt verən "ağıllı dərmanlarla" (xüsusi hədəf molekulların təsir mexanizminə müdaxilə edərək xərçəng hüceyrələrinin böyüməsinə maneə törədən molekulyar- hədəflənmiş terapiya növü) müalicə olunub.

 

Sonda Nailə Əsədullayeva məruzəyə dair sualları cavablandırıb.