İstanbul Texniki Universitetində (İTU) sensorlar və süni intellektdən istifadə etməklə autizmli uşaqların emosiyalarını və stresini oyun vasitəsilə müəyyən edən robot sistemi hazırlanıb.

Aztibb.az bu barədə medimagazin.com.tr-yə istinadla məlumat verir.

İTU-nun Kompüter və informatika fakültəsinin Süni intellekt və məlumat mühəndisliyi kafedrasının müəllimi, prof. Hatice Kösenin təşəbbüsü ilə autizmli uşaqların emosiyalarını və stresini aşkar etmək məqsədilə araşdırma aparılıb.

Prof. H.Köse və layihə qrupu autizmli uşaqların emosiyalarını və stresini oyun vasitəsilə müəyyən etmək üçün sensorlar və süni intellektdən istifadə edən robot sistemi hazırlayıblar. Layihədə autizmli uşaqlarla “Kaspar” adlı uşağa bənzər robotla terapiya oyunları təşkil edilib və bu oyunlar zamanı uşaqların emosiyaları və stresi müəyyən edilib.

Autizmli uşaqların duyğularını yaxşı ifadə edə bilmədiklərini, xüsusilə stresli olduqları zaman müalicəyə cavab vermədiklərini deyən H.Köse süni intellektin dəstəyi ilə fərqli sensorlardan alınan məlumatları emal edərək terapiya seansında robotla qarşılıqlı əlaqə zamanı onların duyğularını anlamağı hədəflədiklərini bildirib.

O, layihə çərçivəsində Türkiyə, Polşa, İngiltərə və Makedoniyada fərqli uşaq qrupları ilə çalışdıqlarını və müqayisələr apardıqlarını söyləyib. H.Köse layihə qrupunda müxtəlif ölkələrdən olan terapevt, həkim və mühəndislərlə çalışdıqlarını deyib.

"Kaspar robotumuzu Türkiyədə əməkdaşlıq etdiyimiz uşaq bağçalarına apardıq və bu işləri həyata keçirdik. Türkiyədə təxminən 25 uşaqla bu araşdırmanı həyata keçirdik", - deyə H.Köse qeyd edib.